أفضل تمرين لخسارة دهون البطن إلى الأبد!!
هذه المقالة تحتوى على:
دهون البطن أسهل إشي تكسبها، وصعب تخسرها. تحس لو شو ما عملت من تمارين، وحتى إذا قللت أكلك كثير، بتشوف أنه ما في أي تغيير.
وللأسف، ما في عملية أو حبة سحرية تخليك تخسر الدهون من البطن. بس، في تمرين يعتبر أفضل تمرين لخسارة دهون البطن، وبهذا المقال سوف أقلك شو هو هذا التمرين وكيف تقدر تبدأ تنسف دهونك من اليوم.
لماذا من الصعب خسارة دهون البطن؟
بس بالبداية، خلينا نفهم ليش أصلًا صعب تخسر دهون البطن. العامل الأساسي، علميًا، هو أن بعض المناطق سهل تخسر منها دهون، وبعض المناطق الثانية صعب، هو الجينات. لأن الجينات هي اللي تحدد المنطقة اللي تخسر منها دهون. أغلب الناس، جينيًا، بخزنوا الدهون أسرع شيء بمنطقة البطن، وبتكون أصعب منطقة يخسروا الدهون منها.
كيف تخسر دهون البطن؟
بس إذا أكلت أقل من احتياجك، وكانت السعرات الداخلة أقل من السعرات الخارجة، فالنتيجة أنك رح تخسر دهون.
وإضافة التمارين رح تساعدك تخسر دهون حتى لو معدل حرقك بدأ يقل. مثلًا تمارين الركض، السباحة، والدراجة وغيرها، هاي التمارين تحرق سعرات حرارية عالية. على سبيل المثال، إذا ركضت، رح تحرق كل دقيقة 12 سعرة حرارية أكثر من لو كنت جالس وما بتساوي أي حركة.
فتخيل أنك ركضت لمدة 45 دقيقة، رح تحرق حوالي 570 سعرة. وإذا ركضت 3 مرات بالأسبوع، يعني بتحرق 1710 سعرات إضافية.
وعلميًا، عشان تخسر 1 باوند من الدهون، بدك تحرق 3500 سعرة. فتخيل أنك، فقط من خلال الركض 3 مرات أسبوعيًا، رح تحرق نص باوند دهون بالأسبوع تقريبًا. صح علميًا وعلى الورق هذا الكلام ممتاز، بس على أرض الواقع، الأغلب ما بعرف يستمر.
وطبعًا، مش قصدي أن الركض والرياضة اللي بتحتاج مجهود ما بتشتغل، بالعكس، هي فعّالة وبتحرق سعرات. بس المشكلة أنها متعبة وبتأثر على استشفاء عضلاتك إذا بالغت فيها، وأيضًا صعب تستمر عليها لفترة طويلة.
صح، في ناس بتقدر تستمر عليها، لكن نسبتهم قليلة. طيب، شو الحل؟
أفضل تمرين لحرق الدهون!
الحل وأفضل تمرين لحرق الدهون هو المشي، مراجعة ب2021 على 54 دراسة كانت هدفها تقارن بين أنواع الكارديو وتأثيرها على خسارة الدهون. النتائج أظهرت أنه، رغم أن التمارين عالية الشدة مثل الركض تحرق سعرات أكثر بمدة أقصر، إلا أنها ما كان لها أفضلية على خسارة الدهون مقارنة بالكارديو بشدة خفيفة لمدة أطول.
وهذا منطقي؛ لأن جسمك ما بيفرق معه الشدة اللي حرقت فيها 100 أو 200 سعرة. سواء كانت من السباحة، ركوب الخيل، أو حتى المشي بشدة خفيفة. الأهم بالنسبة لجسمك هو كمية السعرات اللي بتحرقها واللي بتقدر تستمر عليها.
بشكل عام: لما تمشي لمدة دقيقة بشدة متوسطة، رح تحرق حوالي 3.4 سعرات بالدقيقة، يعني تقريبًا 200 سعرة في الساعة، وإذا مشيت 5 أيام بالأسبوع، بتحرق حوالي 1000 سعرة إضافية بالأسبوع. يمكن تشوف أن ساعة مشي تعتبر كثيرة، بس فيه طرق بسيطة تقدر تدخل المشي بحياتك بدون ما تحس.
صح أنه الركض يحرق أكثر من المشي، بس المشكلة أنه الأغلب ما بعرف يستمر عليه. عشان هيك المشي يعتبر أفضل تمرين لخسارة دهون البطن. وأنا شخصيًا خسرت 15 كيلو بحوالي 4 أشهر، ومن دون ما أساوي كارديو بالجيم أو أركض لساعات كل يوم. كل اللي عملته هو زيادة نشاطي وخطواتي اليومية.
كيف تزيد نشاطك بسهولة؟
طيب خليني أعطيك أمثلة عملية اللي ساعدتني أزيد خطواتي ونشاطي اليومي:
أولًا مهم أنك تحسب خطواتك اليومية باستخدام ساعة ذكية، أو تطبيق مثل Google Fit إذا عندك أندرويد، أو Health App إذا معك آيفون. بعدها شوف متوسط خطواتك الأسبوعية.
ثانيًا: إبدأ زيد خطواتك بالتدريج، إذا متوسط خطواتك قليل، مثل 3000 أو 4000 خطوة يوميًا، نصيحتي تبدأ تزيدها تدريجيًا. مثلًا: إذا خطواتك 4000، ارفعها لـ6000. بعد أسبوع أو أسبوعين، ارفعها لـ8000.
ثالثًا الهدف اليومي: حاول توصل لـ8000-10000 خطوة يوميًا. بشكل عام، 10 دقائق مشي تساوي تقريبًا 1200 خطوة. يعني، إذا ضفت 20 دقيقة مشي يوميًا، رح تزيد خطواتك بـ2400 خطوة إضافية.
أشياء ساعدتني أزيد خطواتي شخصيًا:
- بالجامعة: كنت دائمًا أجلس بآخر المكتبة، فكنت أمشي أكثر لما أحتاج أروح أوكل أو أشرب.
- الوقوف بعيد: أوقف السيارة بمكان بعيد لما أروح الجامعة أو السوبرماركت.
- استعمل الدرج بدل المصعد.
- أمشي بعد الوجبات: أمشي الصبح شوية أو بعد كل وجبة.
- الجيم مشيًا: أروح للجيم مشي بدل السيارة.
- أيام العطلة: أزيد فيها خطواتي وأتحرك أكثر.
نصيحتي أنك تختار الطريقة اللي تناسبك وتقدر تستمر عليها وتلتزم فيها. رح تلاحظ أنك تخسر الوزن أسرع وأسهل ومن دون حرمان. أيضًا، رح تقدر تأكل سعرات حرارية أعلى شوية بسبب أنك زدت السعرات اللي تحرقها، مما يقلل الجوع ويساعدك تتحكم بشهيتك.
بالنهاية لا تنسى أن تهتم بتغذيتك وتأكل أقل من إحتياجك، وتتبع نظام غذائي مخصص لهدفك ولنمط حياتك، ومش تزيد نشاطك اليومية فقط، أما تغذيتك تكون عشوائية.
إذا تحب أن تشاهد الموضوع على شكل فيديو وبشكل أوسع، تقدر تلاقيه على قناتي في اليوتيوب:
لو هدفك تحسن من صحتك وتوصل لجسم أحلامك بسرعة، هنا المكان المناسب ورح أساعدك تحقق هدفك وأختصر عليك الوقت!
